N.B. Ini nga Rito sarang magamit sang mga panimalay nga nagatipon sa ila puloy-an ukon sa sementeryo sa pagdumdom kag pagpangamuyo para sa ila mga pinalangga nga mga minatay.
PANAMYAW:
L. Sa ngalan sang Amay kag sang Anak, kag sang Espiritu Santo.
T. Amen.
L: Mga utod, nagatipon kita karon sa pagpangamuyo sa aton pinalangga nga mga minatay. Nagtaliwan na sila halin sa kamatayon pakadtu sa kabuhi upod sa aton Ginoong Jesus, nga napatay kag nabanhaw, kag karon gintinluan na sila sa ila mga sala. Mangamuyo kita sa Dios nga abi-abihon sila upod sa tanan nga mga Santos sa langit.
PAGBASA SANG PULONG SANG DIOS
BALASAHON 1 Tes. 4: 13-18
Ang pagbasa gikan sa Nahauna nga Sulat ni San Pablo sa mga taga- Tesalonica.
Mga kautoran, luyag namon nga mahibaluan ninyo ang kamatuoran nahanungod sa mga nagkalamatay, agod nga indi kamo magkasubo subong sang iban nga wala sing paglaom. Nagatuo kita nga si Jesus napatay kag nabanhaw. Gani, nagatuo man kita nga pagadalhon sang Dios upod kay Jesus ang tanan nga nagkalamatay nga nagatuo sa iya.
Amo ini ang pagtulon-an sang Ginoo nga amon ginasugid sa inyo: kita nga mga buhi pa sa adlaw sang pag-abot sang Ginoo, indi mag-una sa ila nga mga nagkalamatay na. Kay sa singgit sang pagmando, sa tingog sang arkanghel kag sa tunog sang trumpeta sang Dios, ang Ginoo gid magapanaog gikan sa langit. Ang tanan nga nagkalamatay nga nagatuo kay Kristo pagabanhawon sing una. Dayon kita nga mga buhi pa sa sadto nga tion, pagatipunon upod sa ila sa mga panganod sa pagsugata sa Ginoo sa kahawaan. Ti, mangin kaupod kita sa Ginoo sing dayon. Gani, maglinipayay kamo sa sini nga mga pulong.
Ang Pulong sang Dios.
S: Salamat sa Dios.
SALMO SA PAGSABAT Sal. 25
Sa Imo, O Ginoo ginabayaw ko ang akon kalag.
- O Dios, sa Imo nagasalig ako. Luwasa ako sa kahuloy-an sang pagkalutos; indi ako pagpakadlawi sa akon mga kaaway! Indi malutos ang mga nagasalig sa imo, kundi ang madali magbato sa imo. (S)
- Tudloi ako sang imo mga dalan, O Ginoo, ipakilala man ini sa akon. Tudloi ako sa pagkabuhi suno sa imo kamatuoran, kay ikaw ang akon Dios nga nagaluwas sa akon. Sa bug-os nga adlaw nagasalig ako sa imo. (S)
- Ginoo, dumdoma man ang imo kaayo kag mapinadayunon nga gugma, nga imo ginpakita halin pa gid sang una. Patawara man ang mga sala kag kasaypanan sang akon pagkapamatan-on, tungod sang imo mapinadayunon nga gugma kag kaayo, dumdoman ako, O Ginoo. (S)
- Ang Ginoo matarong kag maayo, ginatudloan niya ang mga makasasala sang dalan nga ila pagaagyan. Ginatuytoyan niya ang mapainuboson sa matadlong nga dalan, kag iya sila ginatudloan sang iya kabubut-on. (S)
- Ginatuytoyan niya ang mapainubuson sa matadlong nga dalan, kag iya sila ginatudloan sang iya kabubut-on. Sa gugma kag katutom iya ginatuytoyan ang tanan nga nagatuman sang iya kasugtanan kag mga kasugoan. Tumana man ang imo ginsaad, O Ginoo, kag patawara man ang akon mga sala, kay tama ini kadamo. (S)
LITANIYA
Ginoo, maluoy ka Ginoo, maluoy ka
Kristo, maluoy ka Kristo, maluoy ka
Ginoo, maluoy ka Ginoo, maluoy ka
Santa Maria, Iloy sang Dios ig-ampo mo sila
San Miguel ig-ampo mo sila
San Juan Bautista ig-ampo mo sila
San Jose ig-ampo mo sila
San Pedro ig-ampo mo sila
San Pablo ig-ampo mo sila
San Andres ig-ampo mo sila
San Esteban ig-ampo mo sila
Santa Ana ig-ampo mo sila
Santa Teresa ig-ampo mo sila
Santa Catalina ig-ampo mo sila
San Frances Cabrini ig-ampo mo sila
Santa Elisabet Seton ig-ampo mo sila
Santa Teresa sang Calcutta ig-ampo mo sila
San Sebastian ig-ampo mo sila
San Vicente, diakono ig-ampo mo sila
San Juan Bosco ig-ampo mo sila
San Lorenzo Ruiz ig-ampo mo sila
San Pedro Calungsod ig-ampo mo sila
(Sarang madugang ang ngalan sang iban nga mga santos)
Tanan nga mga Santos ig-ampo ninyo sila
Kristo, patawara ang ila mga sala dungga man kami Ginoo
Kristo, dumduma ang mga maayo nila nga mga binuhatan dungga man kami Ginoo
Kristo, batuna sila sa kabuhi walay katapusan dungga man kami Ginoo
Kristo, lugpaya ang tanan nga nagahibi dungga man kami Ginoo
Ginoo, maluoy ka Ginoo, maluoy ka
Kristo, maluoy ka Kristo, maluoy ka
Ginoo, maluoy ka Ginoo, maluoy ka
P. Kay Kristo yara ang kaluoy kag ang kapupun-an sang kaluwasan. Mangamuyo kita sang pangamuyo nga gintudlo ni Jesus sa aton.
T. Amay Namon…
PANGAMUYO
Makagagahom nga Amay, paagi sa misteryo sang krus, Imo kami ginapakabakod: paagi sa sakramento sang pagkabanhaw Imo kami ginselyuhan nga mangin Imo. Tuloka sing may kaluoy ang Imo mga alagad nga karon nahilway na sa kadena sang mamalatyon nga kabuhi kag karon isipa sila upod sa Imo mga santos sa langit. Ini amon ginapangamuyo, paagi kay Kristo nga amon Ginoo. T. Amen.
KATAPUSAN NGA HILIKUTON
P. Hatagi sila, O Ginoo, sang kapahuwayan nga dayon.
T: Kag magsilak sa ila ang kapawa nga wala sing katapusan.
P. Kabay pa nga magpahuway sila sa paghidait.
T: Amen
P. Kabay pa nga ang ila mga kalag kag ang mga kalag sang tanan nga mga tumoluo nga nagtaliwan, sa kaluoy sang Dios magpahuway sa paghidait nga dayon.
T: Amen.
P. Sa ngalan sang X Amay kag sang Anak, kag sang Espiritu Santo.
T. Amen.
No Responses