Nagdangat sa ginabulu-banta kapin 100 ang nangin-benepisyaryo sa ginpatigayon nga donation drive sang Sta. Maria Magdalena Parish-Hinigaran paagi sa bulig sang Our Lady of Pillar Parish-Ma-ao, sa tinalikdan nga Sabado, Disyembre 14, sa Kapilya sang Barangay Ilijan, sa siyudad sang Bago.
Lakip sa mga naka-benepisyo amo ang mga residente sang Barangay Ilijan nga naapektuhan sa paglupok sang Bulkan Kanlaon. Kinarton na mga ready-to-eat goods kaangay sang mga biskwit kag de-lata ang ginpanagtag sa mga residente, amo man ang mga bugas, bihon, drinking water, panapton, face masks kag snacks.
Nahibaluan nga nag-lunsar sang donation drive ang Parokya, inadlaw matapos ang paglupok sang Bulkan Kanlaon sa naka-ligad nga Lunes, kun sa diin nag-luntad ang “ashfall” sa mga kabanwahanan kag siyudad sa West kag North-western sides sang bulkan, lakip ang siyudad sang Bago kun sa diin kabahin ang Barangay Ilijan.
Samtang sa isa ka Facebook post sa page sini, nag-pasalamat naman ang Sta. Maria Magdalena Parish, sa mga tumuluo sini nga nag-suporta sa katuyu-an sang parokya nga magpalambot sang bulig sa mga naapektuhan sa paglupok sang bulkan; amo man sa Our Lady of Pillar Parish, nga nangin kabulig sa distribution sa area, sa pagpanguna ni Rev. Fr. Darcy Galas, Parochial Vicar sang nasambit nga parokya.
Written by: Joshua Christopher P. Belas SOCCOM, SMMP
Katoliko Ako DYAF 1143 Ang Radyo Ko!
#DYAF1143 #CMNBacolod
