December 2, 2024
Pagdumdum kay Santa Bibiana
Ginadumdum naton si Santa Bibiana, isa ka matarong nga babaye sang Roma sa mga tini-on nga ginapanghingabot ang mga Kristyano sang Emperador nga si Julian the Apostate. Ang bug-os nga pamilya ni Bibiana, nga sanday Dafrosa kag Flavianus, mga maayo nga Kristyano, ginpamatay man sang emperador bangud sa ila pagtuo.
Pagkatapos mapatay ang ila ginikanan, si Bibiana kag ang iya utod nga si Demetria ginpaatubang sa emperador kag ginpriso. Sa sulod sang prisohan, nagpadayon sila sa pagpangamuyo kag pagpanginulsol sa pagpuasa. Sang ginpresentar sila sa husgado, ginhatagan sila sang sentensya nga kamatayon. Si Demetria napatay sa tribunal, pero si Bibiana gintinguhaan pa nga mapahalin sa iya pagtuo bilang Kristyano. Sa tanan nga pagsulay, wala gid siya nagpasugot kag nagpabilin nga maligon sa iya pagtuo.
Sa katapusan, ginbakol siya hasta mapatay. Ang iya bangkay ginbilin lang sa kilid sang dalan para makaon sang mga sapat kag ido, pero wala gid sang may nagtandog sang iya lawas. Pagkaligad sang duha ka adlaw, may isa ka matarong nga Kristyano nga nagkuha sang iya lawas kag naglubong sini sa insakto nga paagi.
Tungod sang iya pagtuo kag pagkamapinalandongon sa pag-alagad sa Diyos bisan sa atubang sang matuod nga peligro, si Santa Bibiana ginakilala nga isa ka ehemplo sang pagkamartir. Isa siya sa mga pinakauna nga mga birhen kag martir sang Roma, kaupod nila Santa Cecilia kag Santa Ines, nga padayon nga ginakilala sa kasaysayan sang Simbahan bilang mga haligi sang pagtuo sa tunga sang paghingabot.
Katoliko Ako DYAF 1143 Ang Radyo Ko!
#DYAF1143 #CMNBacolod
