HANDURAW – DYAF 1143

November 30, 2024

Handuman sang Mahal nga Iloy sa iya titulo nga Nuestra Señora de Salvacion

Ang Handumanan sang aton Mahal nga Iloy sa iya titulo nga Nuestra Señora de Salvación isa ka matahom nga pamalandungan sa pagpakilala sang wala untat nga gugma kag pagbulig sang Birhen Maria sa aton nga mga Kristiyano. Ini nga debosyon nga may kinaandan diri mismo sa Pilipinas nagatuhaw halin sa isa ka madinaugon nga sugilanon sang pagtuo kag milagro.

Ang sugod sini nga debosyon halin sa banwa sang Joroan sa Tiwi, Albay, sa diin isa ka magamay nga kahoy nga estatwa ang ginhimo nga nagapakita sang aton mahal nga Iloy. Sa iya wala nga kamot, ginabitbit niya si bata nga jesus, nga nagapakita sang iya pagka-Inahan sang Dios. Sa iya tuo nga kamot, ginapakita niya nga ginaprotektahan niya ang isa ka tawo nga daw madagdag na sa kamot sang demonyo. Ini nga imahe nagapabutyag sang pagprotekta sang Mahal nga Birhen sa mga tumuluo batok sa pwersa sang panulay kag kalainan.

Ang imahe man nagapakita nga ang bata nga jesus nagabaton sang nagakalayo nga mga tagipusoon nga ginahalad sa iya sang isa ka anghel. Ini nagapadumdum sa aton nga ang aton Ginoong Hesukristo handa magbaton sang pagpalapit kag pagtugyan sang tanan nga kalag sa iya pinaagi sang Mahal nga Birhen.

Subong nga adlaw, ginaselebrar ini nga titulo bilang Patron sang Parokya sang Banago, isa ka pagpasalamat sa pagpalangga kag pag-amuma sang Nuestra Señora de Salvación. Magapadayon kita sa pagtuo kag pagsalig sa iya, nga ang aton Mahal nga Iloy magapadayon gid sa paggiya kag pagbulig sa aton sa tanan nga tion.