November 28, 2024
Handumanan ni Santiago de Marses | St. James of The Marches
Si Santiago De Marses, isa ka pransiskano nga prayle, ginakilala bangud sa iya kabuhi nga puno sang kapigaduhon kag debosyon sa pagpuasa. Ang iya pagpinitensya naglab-ot sa punto nga ang Santo Papa mismo nagsugo sa iya nga magkaon bilang isa ka serbisyo publiko para sa mga tawo. Si Saint Bernardine of Siena naghangkat man sa iya nga hagan-haganan ang iya ginahimo nga mabug-at nga pagpuasa kag pagpinitensya.
Sa pihak sang tanan, nangin bantog si Santiago De Marses bilang santo bangud sa iya kontribusyon nga ginatawag “amay sang moderno nga prendahan” ukon “Father of Modern-Day Pawnshops”. Sa iya panahon, mataas kaayo ang interes sang mga nagapaprenda. Agud buligan ang mga nagakinahanglan, nagtukod siya sang “Montes Pietatis”, isa ka pamaagi sang charity works nga nagahatag sang barato nga interes para sa mga nagapaprenda.
Ini nga sistema nagin inspirasyon para sa mga nagapapautang kag nagapaprenda nga maghatag sang Kristyano nga konsiderasyon kag kabuot sa ila mga kauturan nga nagakinhanglan sang bulig. Ang buhat ni Santiago De Marses nagapakita sang dako nga pagserbisyo sa isigkatawo, kag ini nagapabilin nga isa ka maalam kag maayo nga ehemplo tubtob subong.
Katoliko Ako DYAF 1143 Ang Radyo Ko!
#DYAF1143 #CMNBacolod
