November 26, 2024
Handumanan ni Sylvestro Gozzolini
Isa ka pari nga nagpalayo sa kalibutan bilang ermitanyo kag nakatukod sang isa ka monasteryo bangud sang kadamuon sang mga tawo nga nagsunod sa iya.
Siya nagsugod bilang isa ka abogado, anak man sang isa ka abogado, pero sa ulihi nahingyo siya nga mag-alagad bilang pari. Sa iya pagkapari, isa ka adlaw nakita niya ang isa ka bangkay nga naga-agnas. Diri siya napamalandong sang matuod nga kahulugan sang kabuhi, kag nahangpan niya nga ang aton kabuhi diri sa kalibutan, umalagi lang.
Ini ang nagtulod sa iya nga magpalayo sa kalibutan kag idedikar ang iya bug-os nga kabuhi kag ang nabilin nga mga tinion sa pagpangamuyo kag pagpamalandong sang mga pagtulun-an sang Diyos.
Nagsugod siya bilang isa ka ermitanyo sa katawhay, pero bangud sang iya maayong pagkinabuhi, madamo ang nahingyo kag nagsunod sa iya. Sa iya kabuhi, nakatukod siya indi lang isa, kundi onse ka mga monasteryo nga nagasunod sa Regula ni San Benedito.
Ang iya kabuhi isa ka pagpakita sang pagtuo, paghalad, kag madalom nga pag-alagad sa Diyos.
Katoliko DYAF 1143 Ang Radyo Ko!
#DYAF1143 #CMNBacolod
