December 5, 2024
Handumanan ni San Sabas
Subong nga adlaw aton ginadumdum si San Sabas, isa ka bantog nga santo nga naghalad sang iya kabuhi para sa Diyos pinaagi sa bug-os nga pagtuo, pagpuasa, kag pagpangamuyo. Siya ginatawag nga “gifted child” tungod sa iya kaalam nga nagpakita bisan pa sang bata pa siya, ilabi na sa pagtuon sang kasulatan kag mga espiritwal nga butang.
Sa edad nga 17, siya nangin monghe kag ginpakita ang iya seryoso nga pag-alagad sa Diyos. Ang iya dedikasyon makit-an sa iya ginhimo nga promesa nga indi magkaon sang mansanas matapos siya natemtar nga maglapas sa iya pagpuasa. Sugod sina nga adlaw, iya ginpakita ang iya bug-os nga pagtugyan sang kaugalingon sa Diyos, bisan pa sa mga simple nga pamaagi, nga nagapahayag sang iya pagserbisyo nga hilway sa personal nga pagbuot.
Ang paghatag ni San Sabas sang iya kabuhi sa Diyos nagdala sang madamo nga milagro. Kilala siya tungod sa iya mga ginpatindog nga monasteryo, ilabi na gid ang milagroso nga monastery sa Holy Land nga ginatawag nga Labra. Ini nga lugar kilala bangud sa tubig nga makapabulong sang mga masakit kag makapatalang sang mga demonyo, nga nagapakita sang gahom kag grasya sang Diyos pinaagi sa iya.
Si San Sabas nagapakita nga ang pagtuo, pagpuasa, kag pagsakripisyo mahimo magdala sang kabug-usan kag kahimayaan sa kabuhi. Ang iya kabuhi nagapukaw sang inspirasyon sa aton tanan, nga magpangabuhi nga may bug-os nga pagtuo, pagtugyan, kag paghigugma sa Diyos. Ang iya dedikasyon kag pagkamangin-alagad nagapabilin nga modelo sang pagsunod kag pag-alagad para sa tanan nga nagapangita sang espiritwal nga kaayuhan.
Katoliko Ako DYAF 1143 Ang Radyo Ko!
#DYAF1143 #CMNBacolod
